ໃນໂອກາດທີ່ມາເຄື່ອນໄຫວຢ້ຽມຢາມແລກປ່ຽນບົດຮຽນລະຫວ່າງວັນທີ 30/10-02/11/2024 ທ່ານ ນາງ ຟາມທິທູຫ່ຽນ ຮອງຜູ້ອຳນວຍການສະຖາບັນພະນັກງານກວດກາຄະນະກວດກາລັດຖະບານ ພ້ອມດ້ວຍຄະນະ ໄດ້ຢ້ຽມຢາມແລກປ່ຽນບົດຮຽນຢູ່ ອົງການກວດກາແຫ່ງລັດ, ໂດຍໃຫ້ກຽດຕ້ອນຮັບຢ່າງອົບອຸ່ນ ຂອງ ທ່ານ ປອ ດາວບົວລະພາ ບາວົງເພັດ ຮອງປະທານ ອົງການກວດກາແຫ່ງລັດ ພ້ອມທັງໄດ້ສະແດງຄວາມຍິນດີຕ້ອນຮັບຄະນະຜູ້ແທນ ທີ່ໄດ້ໃຫ້ກຽດມາເຄື່ອນໄຫວຢ້ຽມຢາມພົບປະໃນຄັ້ງນີ້. ຈາກນັ້ນ, ທ່ານ ນາງ ຟາມທິທູຫ່ຽນ ກໍ່ໄດ້ກ່າວຄຳຂອບໃຈຕໍ່ການຕ້ອນຮັບຢ່າງສົມກຽດ, ອົບອຸ່ນ, ຈິງໃຈ ແລະ ແຈ້ງຈຸດປະສົງໃນການເຄື່ອນໄຫວຢ້ຽມຢາມຢູ່ ສປປ ລາວ ຕື່ມອີກ. ໂອກາດດຽວກັນນີ້, ກໍ່ໄດ້ມີພິທີພົບປະລະຫວ່າງ ອົງການກວດກາແຫ່ງລັດ ກັບ ຄະນະກວດກາລັດຖະບານ ສສ ຫວຽດນາມ, ຕາງໜ້າອົງການກວດກາແຫ່ງລັດໂດຍ ທ່ານ ວັນຄຳ ໄຊວົງສັກ ຫົວໜ້າກົມຄົ້ນຄວ້າ ແລະ ວາລະສານກວດກາ ພ້ອມທັງລາຍງານຫຍໍ້ກ່ຽວກັບການເຄື່ອນໄຫວວຽກງານກວດກາລັດ, ສະກັດກັ້ນ ແລະ ຕ້ານການສໍ້ລາດບັງຫຼວງຂອງ ສປປ ລາວໃນໄລຍະທີ່ຜ່ານມາ.

ພ້ອມນີ້, ທັງສອງຝ່າຍ ຍັງໄດ້ມີການແລກປ່ຽນຄໍາຄິດເຫັນດ້ານວິຊາການຢ່າງກົງໄປກົງມາກ່ຽວກັບການດໍາເນີນການກວດກາ ແລະ ການດໍາເນີນການສືບສວນ-ສອບສວນຄະດີສໍ້ລາດບັງຫຼວງຕື່ມອີກ. ໂອກາດດຽວກັນນີ້ກໍ່ໄດ້ຢ້ຽມຊົມສະຖານທີ່ທ່ອງທ່ຽວທາງດ້ານວັດທະນະທຳຂອງນະຄອນຫຼວງວຽງຈັນຈຳນວນໜຶ່ງ.