ໃນຕອນບ່າຍວັນທີ 18 ມີນາ 2024, ທີ່ຫ້ອງປະຊຸມ ກະຊວງ ແຜນການ ແລະ ການລົງທຶນ ໄດ້ຈັດພິທີເປີດຊຸດຝຶກອົບຮົມວຽກງານກວດກາພັກ-ລັດ ທົ່ວຂະແໜງແຜນການ ແລະ ການລົງທຶນ ຊຸດທີ VI ຂຶ້ນ ພາຍໃຕ້ການເປັນປະທານຂອງ ສະຫາຍ ນາງ ພອນວັນ ອຸທະວົງ ຄະນະປະຈຳພັກ, ຮອງລັດຖະມົນຕີ, ປະທານຄະນະກວດກາພັກກະຊວງ, ມີເລຂາໜ່ວຍພັກບັນດາກົມ, ຜູ້ຕາງໜ້າຈາກຄະນະກວດກາສູນກາງພັກ, ຜູ້ກວດກາໜ່ວຍພັກ, ພະນັກງານຫຼັກແຫຼ່ງບັນດາກົມພາຍໃນກະຊວງ ຜທ, ພະນັກງານຜູ້ທີ່ເຮັດວຽກງານກວດກາ ຂອງຂະແໜງກວດກາ ພະແນກແຜນການ ແລະ ການລົງທຶນ ແຂວງ, ນະຄອນຫຼວງ ແລະ ແຂກຖືກເຊີນເຂົ້າຮ່ວມ.

ໃນໂອກາດກ່າວເປີດພິທີ ສະຫາຍ ນາງ ພອນວັນ ອຸທະວົງ ໃຫ້ຮູ້ວ່າ: ພັກ-ລັດເຮົາຍາມໃດກໍຖືເອົາການຕິດຕາມກວດກາ ແມ່ນໜຶ່ງໃນພາລະບົດບາດ ຕົ້ນຕໍແຫ່ງການນຳພາຂອງພັກ “ຖ້າບໍ່ມີການກວດກາກໍ່ໝາຍຄວາມວ່າບໍ່ມີການນຳພາ” ເປັນວຽກທີ່ສອດຫ້ອຍເຂົ້າທຸກຂົງເຂດວຽກງານ, ຕ້ອງເຮັດເປັນປົກກະຕິ ໃນການຕິດຕາມ, ກວດກາການນໍາພາຂອງພັກ ແລະ ການຄຸ້ມຄອງການບໍລິຫານຂອງລັດ; ການປະຕິບັດໜ້າທີ່ການເມືອງຂອງຄະນະພັກແຕ່ລະ ຂັ້ນ ແລະ ການຄຸ້ມຄອງບໍລິຫານລັດ ໃນເງື່ອນໄຂໃໝ່ ຍົກສູງບົດບາດວຽກງານກວດກາ ເພື່ອເປັນເຄື່ອງມືຊອກເຫັນດ້ານດີ, ດ້ານຕັ້ງໜ້າເພື່ອເສີມຂະຫຍາຍ, ຊອກໃຫ້ເຫັນດ້ານອ່ອນຂໍ້ຄົງຄ້າງ ເພື່ອປັບປຸງແກ້ໄຂໃຫ້ທັນເວລາ, ເປັນການ ສະກັດກັ້ນ ແລະ ແກ້ໄຂປະກົດການຫຍໍ້ທໍ້ຕ່າງໆເລີ່ມແຕ່ຫົວທີ. ສະນັ້ນ, ຊຸດຝຶກອົບຮົມໃນຄັ້ງນີ້ ແມ່ນມີຄວາມສໍາຄັນຫຼາຍ ເພື່ອຍົກລະດັບຄວາມສາມາດ, ເສີມຂະຫຍາຍສະຕິປັນຍາ, ສ້າງຄວາມເຂັ້ມແຂງໃຫ້ແກ່ຜູ້ທີ່ເຮັດວຽກງານກວດ ກາ, ເປັນການຮຽນຮູ້ແລກປ່ຽນບົດຮຽນເຊິ່ງກັນ ແລະ ກັນ, ສາມາດຕອບສະໜອງຕາມຄວາມຮຽກຮ້ອງຕ້ອງການໜ້າທີ່ການເມືອງໃນໄລຍະໃໝ່ ແລະ ເປັນການກະຕຸກຊຸກຍູ້ການເຄື່ອນໄຫວວຽກງານກວດກາພັກ-ລັດ ຂອງບັນດາກົມ, ຫ້ອງການ, ສະຖາບັນ, ສູນສະຖິຕິແຫ່ງຊາດ ທີ່ຂຶ້ນກັບຄວາມຮັບຜິດຊອບຂອງກະຊວງ ແຜນການ ແລະ ການລົງທຶນ ໃນການຈັດຕັ້ງປະຕິບັດໜ້າທີ່ວຽກງານຂອງຕົນຕາມແນວທາງນະໂຍບາຍຂອງພັກ ແລະ ສອດຄ່ອງກັບກົດໝາຍຂອງລັດ ເຮັດໃຫ້ການເຄື່ອນໄຫວວຽກງານມີຄວາມໂປ່ງໃສ, ສາມາດກວດກາໄດ້; ພ້ອມນີ້ຍັງໄດ້ຮຽກຮ້ອງມາຍັງຄະນະນຳແຕ່ລະຂັ້ນ, ສະມາຊິກພັກ-ພະນັກງານຫຼັກແຫຼ່ງທີ່ເຂົ້າຮ່ວມ ຈົ່ງພ້ອມກັນເພີ່ມທະວີເອົາໃຈໃສ່ຕໍ່ວຽກງານຕິດຕາມ-ກວດກາຕາມພາລະບົດບາດ, ໜ້າທີ່, ຂອບເຂດສິດທີ່ໄດ້ກຳນົດໄວ້ໃນກົດລະບຽບຂອງພັກ, ກົດໝາຍຂອງລັດ, ໂດຍສະເພາະນັກສໍາມະນາກອນ ຕ້ອງຍາດແຍ່ງເອົາຄວາມຮູ້ໃໝ່ກ່ຽວກັບວຽກງານກວດກາຈາກຄູອາຈານ ແລະ ການແລກປ່ຽນບົດຮຽນເຊິ່ງກັນ ແລະ ກັນ ເພື່ອຫັນວຽກງານກວດກາຂອງກະຊວງ ແຜນການ ແລະ ການລົງທຶນ ໃຫ້ມີເຂັ້ມແຂງ ແລະ ທັນສະໄໝເທື່ອລະກ້າວ.