ໃນວັນທີ 21 ທັນວາ 2023 ນີ້, ທີ່ສະໂມສອນຫ້ອງວ່າການປົກຄອງແຂວງບໍ່ແກ້ວ ທ່ານ ປອ ຄໍາພັນ ພົມມະທັດ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ປະທານຄະນະນະກວດກາສູນກາງພັກ, ປະທານອົງການກວດກາແຫ່ງລັດ ແລະ ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ ໄດ້ພົບປະໂອ້ລົມພະນັກງານຫຼັກແຫຼ່ງຂອງແຂວງບໍ່ແກ້ວ, ໂດຍມີຄະນະປະຈໍາພັກແຂວງ, ຄະນະບໍລິຫານງານພັກແຂວງ, ຄະນະທີມງານຈາກຄະນະກວດກາສູນກາງພັກ, ຄະນະກວດກາພັກ-ລັດແຂວງ, ປະທານຄະນະກວດກາພັກ-ລັດເມືອງ, ປະທານກວດກາຄະນະພັກຮາກຖານ, ປະທານກວດກາໜ່ວຍພັກຮາກຖານອ້ອມຂ້າງແຂວງ, ກອງບັນຊາການ ປກຊ-ປກສ ແລະ ພະນັກງານຫຼັກແຫຼ່ງເຂົ້າຮ່ວມ.

ໃນພິທີຄັ້ງນີ້້, ທ່ານ ປອ ບົວຄົງ ນາມມະວົງ ເລຂາພັກແຂວງ, ເຈົ້າແຂວງ ແຂວງບໍ່ແກ້ວ ໄດ້ລາຍງານສະພາບລວມຂອງແຂວງ ແລະ ການນໍາພາຊີ້ນໍາການຈັດຕັ້ງປະຕິບັດວຽກງານຮອບດ້ານໃນໄລຍະກາງສະໄໝຜ່ານມາ ວ່າ: ຄະນະພັກ, ຄະນະນໍາແຂວງບໍ່ແກ້ວ ໄດ້ເອົາໃຈໃສ່ຈັດຕັ້ງເຜີຍແຜ່ເຊື່ອມຊຶມ, ນໍາພາການຈັດຕັ້ງປະຕິບັດບັນດາມະຕິ ຂອງສູນກາງພັກ ກໍຄືຂອງແຂວງ, ແຜນພັດທະນາເສດຖະກິດ-ສັງຄົມ, ກົດລະບຽບພັກ, ມະຕິ, ຄໍາສັ່ງຕ່າງໆ, ໂດຍໄດ້ສຸ່ມໃສ່ກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນໄດ້ທັງໝົດ 481 ໜ່ວຍພັກ, ປັບປຸງແກ້ໄຂໜ່ວຍພັກດຽວນໍາພາຫຼາຍບ້ານໄດ້ຈໍານວນ 10 ບ້ານ, ສໍາເລັດການດໍາເນີນກອງປະຊຸມກາງສະໄໝ ກອງປະຊຸມໃຫຍ່ຂອງພັກໃນທົ່ວແຂວງ; ຕິດຕາມ ກວດກາໂຄງການລົງທຶນຂອງລັດເລີ່ມແຕ່ຫົວທີ ມີ 8 ໂຄງການ ລວມມູນຄ່າ 863 ຕື້ກວ່າກີບ; ກວດກາໂຄງການລົງທຶນ ຂອງລັດທີ່ມີມູນຄ່າ 10 ຕື້ກີບຂຶ້ນ ແລະ ມູນຄ່າ 10 ຕື້ກີບລົງ ມີທັງໝົດ 77 ໂຄງການ, ມູນຄ່າສະພາຮັບຮອງ 1.068 ຕື້ກວ່າກີບ; ຄົ້ນຄວ້າແກ້ໄຂຄໍາຮ້ອງ-ຄໍາສະເໜີ ຂອງພົນລະເມືອງ ທັງໝົດ 19 ສະບັບ; ຄົ້ນຄວ້າການແຕ່ງຕັ້ງພະນັກງານດໍາລົງຕໍາແໜ່ງບໍລິຫານ ຈໍານວນ 163 ສະຫາຍ, ສົ່ງພະນັກງານນໍາພາ-ຄຸ້ມຄອງໄປຍົກລະດັບ ທັງພາຍໃນ ແລະ ຕ່າງປະເທດຈໍານວນ 252 ທ່ານ; ໄດ້ຍຸບໂຮມບາງຂະແໜງການຊ່ວຍວຽກຂັ້ນແຂວງ ແລະ ບາງໜ່ວຍງານກົງຈັກຊ່ວຍວຽກຂັ້ນເມືອງ; ໄດ້ເອົາໃຈໃສ່ສະກັດກັ້ນ-ແກ້ໄຂບັນຫາຢາເສບຕິດ ໃນການຈັດຕັ້ງປະຕິບັດວາລະແຫ່ງຊາດຜ່ານມາ ມີຄະດີຢາເສບຕິດເກີດຂຶ້ນ 532 ເລື່ອງ; ເສດຖະກິດຂອງແຂວງຂະຫຍາຍຕົວໃນລະດັບ 3.2%; ລວມຍອດຜະລິດຕະພັນພາຍໃນ GDP 3.545 ຕື້ກວ່າກີບ, ສະເລ່ຍລາຍຮັບຫົວຄົນ 1.010 ກວ່າໂດລາສະຫະລັດຕໍ່ຄົນຕໍ່ປີ; ໄດ້ສັກຢາປ້ອງກັນພະຍາດທີ່ເກີດຂຶ້ນຕາມລະດູການ ແລະ ສ້າງນໍ້າລິນ ນໍ້າສະອາດກວມ 98,41%, ສ້າງບ້ານສາທາລະນະສຸກແບບຢ່າງກວມ 96,77% ຂອງຈໍານວນບ້ານທົ່ວແຂວງ; ມີກຸ່ມບ້ານວັດທະນະທໍາ 14 ກຸ່ມ, ມີບ້ານວັດທະນະທໍາໃໝ່ໄດ້ 208 ບ້ານ, ມີນັກທ່ອງທ່ຽວເຂົ້າມາທ່ຽວຊົມ ແຂວງບໍ່ແກ້ວ ປີ 2023 ຈໍານວນ 252.831 ເທື່ອຄົນ ສາມາດສ້າງລາຍຮັບຈາກການທ່ອງທ່ຽວໄດ້ 12.641 ກວ່າໂດລາສະຫະລັດ; ມີບ້ານພັດທະນາ ກວມ 48,39%, ມີຄອບຄົວພັດທະນາ ກວມ 59,62%; ມີບ້ານພົ້ນທຸກ ກວມ 75,81%, ມີຄອບຄົວພົ້ນທຸກ ກວມ 79,54% ແລະ ສາມາດສ້າງບ້ານໃຫຍ່ເປັນຕົວເມືອງໃນຊົນນະບົດໄດ້ 4 ບ້ານ; ສຸມໃສ່ສ້າງເມືອງຫ້ວຍຊາຍ ແລະ ເມືອງຕົ້ນເຜິ້ງ ເປັນຫົວໜ່ວຍເຂັ້ມແຂງ-ຮອບດ້ານບັນລຸ 80,8%, ການກໍ່ສ້າງສະໜາມບິນສາກົນບໍ່ແກ້ວ ແມ່ນສໍາເລັດ 96% ພວມສະເໜີເປີດນໍາໃຊ້ພາຍໃນເປັນປົກກະຕິ. ນອກນີ້, ຍັງຍົກໃຫ້ເຫັນບາງດ້ານທີ່ຄົງຄ້າງ, ບົດຮຽນທີ່ຖອດຖອນໄດ້ ແລະ ທິິດທາງແຜນການໃນຕໍ່ໜ້າອີກດ້ວຍ.

ໂອກາດດຽວກັນນີ້ ທ່ານ ປອ ຄໍາພັນ ພົມມະທັດ ຍັງໄດ້ສະແດງຄວາມຍ້ອງຍໍຊົມເຊີຍ ແລະ ຕີລາຄາສູງ ຕໍ່ຄວາມພະຍາຍາມບຸກບືນສູ້ຊົນ ຂອງຄະນະພັກ, ອົງການປົກຄອງທຸກຂັ້ນ ຕະຫຼອດຮອດສະມາຊິກພັກ, ພະນັກງານ ແລະ ປະຊາຊົນບັນດາເຜົ່າຂອງແຂວງບໍ່ແກ້ວ ທີ່ຍາດມາໄດ້ໃນໄລຍະຜ່ານມາ ພ້ອມທັງເນັ້ນໜັກໃຫ້ສືບຕໍ່ຍູ້ແຮງການຜັນຂະຫຍາຍເນື້ອໃນເອກະສານສໍາຄັນຂອງພັກ, ຂອງແຂວງ ແລະ ແຜນພັດທະນາເສດຖະກິດ-ສັງຄົມ ເປັນຕົ້ນ ໃຫ້ອີງໃສ່ທ່າແຮງທີ່ເປັນພື້ນຖານຂອງແຂວງ ເພື່ອກະຕຸ້ນການພັດທະນາເສດຖະກິດໃຫ້ເຕີບໃຫຍ່ຂະຫຍາຍຕົວ, ສາມາດສ້າງວຽກເຮັດງານທໍາໃຫ້ປະຊາຊົນ ເຮັດໃຫ້ປະຊາຊົນຫຼຸດພົ້ນຈາກຄວາມທຸກຍາກເທື່ອລະກ້າວ ໄປຄຽງຄູ່ກັບການພັດທະນາວັດທະນະທໍາ-ສັງຄົມ ມີຄວາມສະຫງົບ, ສີວິໄລ; ພ້ອມນີ້, ຍັງຮຽກຮ້ອງມາຍັງຄະນະພັກ, ຄະນະນໍາແຕ່ລະຂັ້ນ ຕ້ອງເປັນແບບຢ່າງໃນການນໍາພາ-ຊີ້ນໍາ ການຈັດຕັ້ງປະຕິບັດວຽກງານກວດກາ, ເພີ່ມທະວີການແກ້ໄຂບັນດາໜໍ່ແໜງປະກົດການຫຍໍ້ທໍ້ຕ່າງໆໃນຖັນແຖວສະມາຊິກພັກ-ພະນັກງານ ກໍຄືໃນສັງຄົມ ໂດຍຖືເອົາວຽກງານກວດກາເປັນວຽກງານທີ່ສໍາຄັນ, ເປັນເຄື່ອງມືໃນການເຄື່ອນໄຫວກວດກາການຈັດຕັ້ງປະຕິບັດກົດລະບຽບຂອງພັກ ແລະ ກົດໝາຍຂອງລັດ ຕິດພັນໂດຍກົງກັບການສະກັດກັ້ນ, ຕີຖອຍການສວຍໃຊ້ໜ້າທີ່ຕຳແໜ່ງ, ບັນຫາທີ່ເປັນໄພຄຸກຄາມ, ເປັນໜໍ່ແໜງທີ່ບໍ່ດີ ຕໍ່ການຈັດຕັ້ງພັກ-ລັດ ໃຫ້ໝົດໄປ ແລະ ເພີ່ມທະວີຄວາມສາມັກຄີ ເປັນເອກະພາບພາຍໃນ ໃຫ້ໜັກແໜ້ນ ແນໃສ່ສູ້ຊົນບັນລຸລະດັບຄາດໝາຍທີ່ວາງໄວ້ໃນຕໍ່ໜ້າ.