ໃນໂອກາດດັ່ງກ່າວ ທ່ານ ສູນທະລາ ເຂັມພິລາດ ໄດ້ກ່າວວ່າ: ການເຂົ້າຮ່ວມຝຶກອົບຮົມຄັ້ງນີ້ ເປັນໂອກາດດີ ທີ່ໄດ້ຮໍ່າຮຽນບົດຮຽນອັນໃໝ່ ແລະ ປະສົບການຕົວຈິງຈາກບັນດາຄູ-ອາຈານ ທັງພາຍໃນ ແລະ ຕ່າງປະທດ ກ່ຽວກັບວຽກງານຕ້ານການສໍ້ລາດບັງຫຼວງ, ວຽກງານສືບສວນສອບສວນ ໂດຍລົງເລິກການຕ້ານການສໍ້ລາດບັງຫຼວງ ໃນໂຄງການກໍ່ສ້າງພື້ນຖານໂຄງລ່າງ ແລະ ບັນຫາອື່ນໆຈາກຄະນະຊ່ຽວຊານລະດັບສູງຂອງສາກົນ ແລະ ຂອງ ສປປ ລາວ. ສະນັ້ນ, ເພື່ອບັນລຸຈຸດປະສົງຄາດໝາຍຂອງການຝຶກອົບຮົມຄັ້ງນີ້ ຈຶ່ງຮຽກຮ້ອງມາຍັງບັນດານັກສໍາມະນາກອນທຸກທ່ານ ຈົ່ງສຸ່ມທຸກສະຕິປັນຍາເພື່ອຮໍ່າຮຽນເອົາຄວາມຮູ້ທາງດ້ານທິດສະດີ, ປະສົບການຕົວຈິງ ກ່ຽວກັບວຽກງານດັ່ງກ່າວຈາກບັນດາຄູອາຈານ ໃຫ້ສາມາດຮັບຮູ້, ກໍາແໜ້ນ ແລະ ເປັນບົດຮຽນ ນໍາໄປຈັດຕັ້ງປະຕິບັດຕາມເງື່ອນໄຂຕົວຈິງ ໃຫ້ມີປະສິດທິພາບ, ປະສິດທິຜົນສູງ ພ້ອມທັງເອົາໃຈໃສ່ໃນການຮັບຟັງການບັນລະຍາຍ, ຕັ້ງຄໍາຖາມ ແລະ ຕອບຄໍາຖາມ ຢູ່ໃນຂອບເຂດບົດຮຽນຕາມຫົວຂໍ້ຢ່າງມີຄວາມຮັບຜິດຊອບຂອງຕົນ ເພື່ອແລກປ່ຽນບົດຮຽນ ແລະ ຄວາມຮູ້ຈາກຄະນະຊ່ຽວຊານ ເພື່ອສ້າງບາດກ້າວໃໝ່ທາງດ້ານຈິນຕະນາການ ເພື່ອນໍາໄປໜູນໃຊ້ເຂົ້າໃນການຈັດຕັ້ງປະຕິບັດໜ້າທີ່ວຽກງານຕາມເງື່ອນໄຂຕົວຈິງ ຂອງແຕ່ລະພາກສ່ວນ.