ຝຶກອົບຮົມສີມືການຫຍິບກະໂປ່ງໂຕະ ແລະ ແກະສະຫຼັກໝາກໄມ້ ໃຫ້ແມ່ຍິງ ຄະນະກວດກາສູນກາງພັກ ແລະ ອົງການກວດກາແຫ່ງລັດ
04/01/2023
ຕອນເຊົ້າວັນທີ 12 ກໍລະກົດ 2022, ທີ່ສະໂມສອນຄະນະກວດກາສູນກາງພັກ ໄດ້ເປີດບັ້ນຝຶກອົບຮົມການຫຍິບກະໂປ່ງໂຕະ ແລະ ແກະສະຫຼັກໝາກໄມ້ ໃຫ້ແມ່ຍິງພາຍໃນສະຫະພັນແມ່ຍິງ ຄະນະກວດກາສູນກາງພັກ ໂດຍການເປັນປະທານ ຂອງທ່ານ ນາງ ບຸນອ້ອມ ອຸ່ນມະໂນ ຄະນະບໍລິຫານງານສູນກາງສະຫະພັນແມ່ຍິງລາວ, ປະທານສະຫະພັນແມ່ຍິງຄະນະກວດກາສູນກາງພັກ ແລະ ອົງການກວດກາແຫ່ງລັດ, ມີນັກວິທະຍາກອນຈາກສູນກາງສະຫະພັນແມ່ຍິງລາວ 3 ທ່ານ ແລະ ນັກສໍາມະນາກອນຈາກສະຫະພັນແມ່ຍິງ ຄະນະກວດກາສູນກາງພັກ ເຂົ້າຮ່ວມທັງໝົດ 13 ທ່ານ.
ໂອກາດນີ້, ທ່ານ ນາງ ບຸນອ້ອມ ອຸ່ນມະໂນ ກ່າວວ່າ: ການຈັດຝຶກອົມຮົມຄັ້ງນີ້ ເພື່ອເປັນການຂໍ່ານັບຮັບຕ້ອນ ວັນສ້າງຕັ້ງສະຫະພັນແມ່ຍິງລາວຄົບຮອບ 67 ປີ (20/07/1955-20/07/2022) ແລະ ເພື່ອເປັນການປະຕິບັດແຜນການເຄື່ອນໄຫວ ປະຈໍາປີ 2022 ຂອງສະຫະພັນແມ່ຍິງຄະນະກວດກາສູນກາງພັກ ແລະ ອົງການກວດກາແຫ່ງລັດ ໃຫ້ມີຄວາມໝາຍສຳຄັນ, ມີບັນຍາກາດຟົດຟື້ນມ່ວນຊື່ນ ແລະ ສ້າງໄດ້ຄວາມສາມັກຄີເຊິ່ງກັນ ແລະ ກັນ ແນ່ໃສ່ສ້າງຄວາມຮູ້ ພື້ນຖານກ່ຽວກັບງານສີມືໃຫ້ແກ່ເອື້ອຍນ້ອງແມ່ຍິງ ເພື່ອມາໝູນໃຊ້ເຂົ້າໃນການປະຕິບັດຕົວຈິງ ໂດຍສະເພາະແມ່ນວຽກພິທີການ ທີ່ຈັດຢູ່ພາຍໃນຄະນະກວດກາສູນກາງພັກ ໃຫ້ມີຄວາມສະດວກຂຶ້ນ ແລະ ຍັງຈະສະມາດນໍາໄປໝູນໃຊ້ເຂົ້າໃນການສ້າງເສດຖະກິດຄອບຄົວ ອີກດ້ວຍ.
ຜ່ານການຝຶກອົບຮົມໄປເປັນເວລາ 1 ມື້ເຕັມ, ເຫັນວ່າ ຄູຝຶກ ຈາກສູນຝຶກອົບຮົມສູນກາງສະຫະພັນແມ່ຍິງລາວ ແມ່ນໄດ້ເອົາໃຈໃສ່ຖ່າຍຖອດຄວາມຮູ້ງານສີມືອັນປານີດຂອງຕົນ ທັງນໍາເອົາທິດສະດີ ແລະ ພາກປະຕິບັດຕົວຈິງ ໃນການແກະສະຫຼັກໝາກໄມ້ ແລະ ການຫຍິບກະໂປ່ງໂຕະ ໃຫ້ແກ່ອື້ຶອນນ້ອງແມ່ຍິງຢ່າງສຸດສີມື, ເອື້ອຍນ້ອງແມ່ຍິງ ກໍ່ໄດ້ມີຄວາມຕັ້ງໃຈຍາດແຍ່ງເອົາຄວາມຮູ້ ທາງດ້ານສີມືອັດປານີດຈາກຄູຝຶກ ດ້ວຍຄວາມເອົາໃຈໃສ່ຢ່າງຈົດຈໍ່ ແລະ ຕັ້ງໜ້າປະຕິບັດຕົວຈິງ ອັນໄດ້ມີຜົນສຳເລັດລົງດ້ວຍຄວາມສວຍງານ, ການຝຶກອົບຮົມຄັ້ງນີ້ສາມາດປະເມີນສີມືໄດ້ຄື: ການແກະສະຫຼັກໝາກໄມ້ ປະເມີນໄດ້ 50%, ການຫຍິບກະໂປ່ງໂຕະ ປະເມີນໄດ້ 80%. ການຝຶກອົບຮົມຄັ້ງນີ້ແມ່ນສາມາດຮັບໃຊ້ໃຫ້ແກ່ວຽກງານດ້ານພິທີການ ຂອງຄະນະກວດກາສູນກາງພັກ ແລະ ອົງການກວດກາແຫ່ງລັດ, ກໍ່ຄືຄອບຄົວຂອງຕົນໄດ້. ເຖິງວ່າເວລາສັ້ນ ແຕ່ກໍ່ສາມາດບັນລຸຕາມຄາດໝາຍເປັນຢ່າງດີ.
