ໃນຕອນເຊົ້າຂອງວັນທີ 26 ມິຖຸນາ 2025 ນີ້ ທີ່ຫ້ອງປະຊຸມຕະຫຼາດຫຼັກຊັບລາວ ໄດ້ມີກອງປະຊຸມເຜີຍແຜ່ເອກະສານວຽກງານສະກັດກັ້ນ ແລະ ຕ້ານການສໍ້ລາດບັງຫຼວງ ໃຫ້ພະນັກງານ ທະນາຄານແຫ່ງ ສປປ ລາວ ໂດຍການເປັນປະທານຮ່ວມຂອງ ທ່ານ ວຽງສະຫວັນ ໄຊຍະວົງ ຫົວໜ້າກົມກວດກາ ທະນາຄານແຫ່ງ ສປປ ລາວ ແລະ ທ່ານ ເທບພະໄທ ພັນກ້າ ຮັກສາການ ຫົວໜ້າກົມຕ້ານ ແລະ ສອບສວນການສໍ້ລາດບັງຫຼວງ ອົງການກວດກາແຫ່ງລັດ ເຊິ່ງມີ ບັນດາ ຄະນະກົມ, ຄະນະພະແນກ ແລະ ພະນັກງານ-ລັດຖະກອນ ຈາກກົມຄຸ້ມຄອງສະຖາບັນການເງິນທີ່ບໍ່ແມ່ນທະນາຄານ, ສໍານັກງານຂໍ້ມູນຕ້ານການຟອກເງິນ, ບໍລິສັດຂໍ້ມູນຂ່າວສານສິນເຊື່ອແຫ່ງ ສປປ ລາວ, ບໍລິສັດຕະຫຼາດແລກປ່ຽນເງິນຕາຕ່າງປະເທດ ຈໍາກັດ ແລະ ຕະຫຼາດຫຼັກຊັບລາວ ເຂົ້າຮ່ວມທັງໝົດ 120 ທ່ານ, ຍິງ 66 ທ່ານ.ກອງປະຊຸມຄັ້ງນີ້ ແມ່ນແນໃສ່ເຮັດໃຫ້ພະນັກງານ-ລັດຖະກອນ ທະນາຄານແຫ່ງ ສປປ ລາວ ໄດ້ຮັບຮູ້, ເຂົ້າໃຈກ່ຽວບັນດາກົດໝາຍ ແລະ ນິຕິກໍາທີ່ກ່ຽວຂ້ອງ ກັບວຽກງານສະກັດກັ້ນ ແລະ ຕ້ານການສໍ້ລາດບັງຫຼວງ ແລະ ນິຕິກໍາຂອງ ທະນາຄານແຫ່ງ ສປປ ລາວ ແນ່ໃສ່ສ້າງສະຕິໃຫ້ພະນັກງານ ຈັດຕັ້ງປະຕິບັດໜ້າທີ່ຢ່າງຖືກຕ້ອງ ແລະ ມີຄວາມຮັບຜິດຊອບສູງ ເພື່ອສະກັດກັ້ນພຶດຕິກໍາການສໍ້ລາດບັງຫຼວງໃນຂົງເຂດທະນາຄານ.