ໃນພິທີດັ່ງກ່າວ ໄດ້ຮັບຟັງການບັນລະຍາຍໂດຍທ່ານ ຄໍາຫຼ້າ ລຽນປະດິດ ເຊິ່ງທ່ານໄດ້ຫວນຄືນຊີວິດການເຄື່ອນໄຫວ ແລະ ຜົນງານທີ່ພົ້ນເດັ່ນຂອງ ຂອງບັນດາສະຫາຍຜູ້ນໍາພັກໃຫ້ແກ່ຜູ້ເຂົ້າຮ່ວມໄດ້ຮັບຟັງໂດຍຫຍໍ້ ແລະ ຍົກໃຫ້ເຫັນເຖິງສະພາບການຖືກປິດລ້ອມ ຂອງກອງພັນທີ 2, ການຜ່າວົງປິດລ້ອມຂອງກອງພັນທີ 2 ແຕ່ວັນທີ 18/5-2/6/1959 ມີຄວາມໝາຍຄວາມສຳຄັນ ແລະ ປັດໄຈພື້ນຖານ ການຜ່າວົງປິດລ້ອມຂອງກອງພັນທີ 2 ເຊິ່ງຄະນະບັນຊາກອງພັນທີ 2 ພາຍໃຕ້ການຊີ້ນໍາຂອງສູນກາງພັກ ໄດ້ໃຊ້ກົນອຸບາຍຫຼອກສັດຕູ ໂດຍໃຊ້ຄວາມມືດໃນການຖອນທັບໄປທາງທິດ ຕາເວັນຕົກສ່ຽງໃຕ້ ມຸ້ງໜ້າເຂົ້າປ່າ ແລະ ນໍາພາ 91 ຄອບຄົວຜ່າວົງປິດລ້ອມທີ່ໜາແໜ້ນຂອງສັດຕູ ໄປສູ່ເຂດທີ່ໝັ້ນຂອງການປະຕິວັດດ້ວຍຄວາມປອດໄພ. ພ້ອມນີ້, ຍັງໄດ້ຍົກໃຫ້ເຫັນເຖິງສາເຫດການໂຕນຄຸກຢ່າງມະຫັດ ສະຈັນຂອງບັນດາຜູ້ນໍາໄປສູ່ຖານທີ່ໝັ້ນ ປະຕິວັດຢ່າງປອດໄພ ຍ້ອນການນຳພາອັນສະຫຼາດສ່ອງໃສ ແລະ ປີຊາສາມາດຂອງ ປະທານໄກສອນ ພົມວິຫານ ແລະ ສູນກາງພັກ, ຍ້ອນນໍ້າໃຈຮັກຊາດອັນແຮງກ້າຂອງບັນດາຜູ້ນຳເຮົາ ທີ່ມີຄວາມກ້າຫານ, ຕັດສິນໃຈຕໍ່ສູ້ຍອມເສຍສະຫຼະມີຄວາມປີຊາສາມາດຂົນຂວາຍ, ສຶກສາອົບຮົມສາລະວັດທະຫານ, ເຮັດໃຫ້ສັດຕູກາຍເປັນມິດສະຫາຍຮ່ວມຕາຍ.

ຕອນທ້າຍຂອງພິທີ ປະທານກອງປະຊຸມ ຍັງໄດ້ຍົກໃຫ້ເຫັນທາດແທ້ທີ່ເປັນມູນເຊື້ອອັນພິລະອາດຫານຂອງບັນພະບູລຸດ ພ້ອມທັງໃຫ້ທິດຊີ້ນໍາການນໍາເອົາແບບຢ່າງຄວາມເສຍສະຫຼະຂອງຜູ້ນໍາໃນເມື່ອກ່ອນ ເພື່ອຜັນຂະຫຍາຍສູ່ໜ້າທີ່ວຽກງານທີ່ຕົນຮັບຜິດຊອບ ໃຫ້ມີການພັດທະນາຢ່າງມີປະສິດທິພາບ ແລະ ປະສິດທີ່ຜົນ.

ຂ່າວໂດຍ: ສຸລິສັກແສງສະຫວັດ