ວັນທີ 27 ພຶດສະພາ 2025 ນີ້ ຄະນະກວດກາພັກ, ອົງການກວດກາລັດແຂວງ ອຸດົມໄຊ ໄດ້ຈັດກອງປະຊຸມ ເຜີຍແຜ່ ວຽກງານຕ້ານການສໍ້ລາດບັງຫຼວງ ແລະ ການຟອກເງິນ ທີ່ຕິດພັນກັບການສໍ້ລາດບັງຫຼວງຂຶ້ນຢູ່ຫ້ອງປະຊຸມ ຫ້ອງວ່າການແຂວງ ໂດຍໃຫ້ກຽດເປັນປະທານຮ່ວມຂອງ ທ່ານ ວາລີ ຈືນໍເຢັງ ກຳມະການພັກແຂວງ, ປະທານຄະນະກວດກາພັກ, ອົງການກວດກາລັດແຂວງ ແລະ ທ່ານ ສູນທະລາ ເຂັມພິລາດ ຮອງຫົວໜ້າກົມຕ້ານ ແລະ ສອບສວນການສໍ້ລາດບັງຫຼວງ ພ້ອມດ້ວຍທີມງານ ອົງການກວດກາແຫ່ງລັດ, ມີບັນດາທ່ານປະທານ, ຮອງປະທານ, ຜູ້ເຮັດວຽກງານກວດກາ ພະແນກການອ້ອມຂ້າງແຂວງ, ອົງການກວດກາລັດເມືອງ 7 ເມືອງ, ເຂົ້າຮ່ວມທັງໝົດ 57 ທ່ານ, ຍິງ 15 ທ່ານ.

ກອງປະຊຸມຄັ້ງນີ້ ທ່ານ ສູນທະລາ ເຂັມພິລາດ ຮອງຫົວໜ້າກົມຕ້ານ ແລະ ສອບສວນການສໍ້ລາດບັງຫຼວງ ພ້ອມດ້ວຍທີມງານ ອົງການກວດກາແຫ່ງລັດ ໄດ້ເຜີຍແຜ່ນິຕິກໍາວຽກງານສະກັດກັ້ນ, ກວດກາ, ສືບສວນ-ສອບສວນການສໍ້ລາດບັງຫຼວງ, ການຟອກເງິນ ທີ່ຕິດພັນກັບການສໍ້ລາດບັງຫຼວງ ແລະ ການແຈ້ງຊັບສິນຂອງພະນັກງານ ເປັນຕົ້ນ: ວຽກງານສະກັດກັ້ນການສໍ້ລາດບັງຫຼວງ, ຄວາມຮູ້ພື້ນຖານ ກ່ຽວກັບວຽກງານສືບສວນ-ສອບສວນ ແລະ ການຟອກເງິນທີ່ຕິດພັນກັບການສໍ້ລາດບັງຫຼວງ, ແນະນໍາວຽກງານແຈ້ງຊັບສິນ ແລະ ລາຍຮັບຂອງພະນັກງານ, ພ້ອມດ່ຽວກັນນັ້ນ ຜູ້ແທນກອງປະຊຸມໄດ້ຮັບຄວາມສົນໃຈບົດຮຽນ ແລະ ກໍ່ພ້ອມກັນຄົ້ນຄ້ວາປະກອບຄໍາຄິດ, ຄໍາເຫັນແລກປ່ຽນບົດຮຽນ ໂດຍສົມທຽບພຶດຕິກໍາຕົວຈິງທີ່ໄດ້ປະຕິບັດຜ່ານມາມີບັນຍາກາດຟົດຟື້ນ.