ກອງປະຊຸມຄັ້ງນີ້ ທ່ານ ອູ່ແສງ ເພັດຊະວົງ ຮອງປະທານຄະນະກວດກາພັກ, ຮອງປະທານອົງການກວດກາລັດແຂວງ ໄດ້ຂຶ້ນລາຍງານການຈັດຕັ້ງປະຕິບັດວຽກງານສະກັດກັ້ນ, ກວດກາ, ການສອບສວນ-ສືບສວນການສໍ້ລາດບັງຫຼວງ, ການຟອກເງິນ ທີ່ຕິດພັນກັບການສໍ້ລາດບັງຫຼວງ ແລະ ການແຈ້ງຊັບສິນຂອງພະນັກງານແຂວງອຸດົມໄຊ ໃນ 1 ປີ ຜ່ານມາໂດຍຫຍໍ້ ໃນນັ້ນ, ໄດ້ໂຄສະນາເຜີຍແຜ່ບັນດານະຕິກໍາເປັນຕົ້ນ ຄໍາແນະນໍາ ເລກທີ 285/ຄກສພ, ຄໍາແນະນໍາ ເລກທີ 379/ຄກສພ, ຄໍາແນະນໍາ ເລກທີ 504/ຄກສພ, ຄໍາແນະນໍາ ເລກທີ 331/ອກຫລ, ດໍາລັດ ເລກທີ 205/ລບ ແລະ ນິຕິກໍາອື່ນໆ ໃຫ້ແກ່ສະມາຊິກພັກ, ພະນັກງານ, ທະຫານ, ຕໍາຫຼວດ ໃຫ້ຮັບຮູ້ຕໍ່ກັບຜົນຮ້າຍ ແລະ ຄວາມເປັນອັນຕະລາຍຂອງການສໍ້ລາດບັງຫຼວງ; ໄດ້ຄຸ້ມຄອງເອກະສານແຈ້ງຊັບສິນ ແລະ ລາຍຮັບຂອງພະນັກງານຂັ້ນແຂວງຄຸ້ມຄອງ ລວມທັງໝົດ 17,076 ທ່ານ, ຍິງ 6,390 ຄົນ, ໄດ້ເປີດຊອງເອກະສານແຈ້ງຊັບສິນ ແລະ ນໍາໃຊ້ເອກະສານແຈ້ງຊັບສິນຂອງເປົ້າໝາຍຖືກກວດກາ-ດໍາເນີນຄະດີ 1 ຄັ້ງ, ນອກຈາກນີ້ ການດໍາເນີນການສືບສວນ-ສອບສວນຄະດີສໍ້ລາດບັງຫຼວງ ໄດ້ດໍາເນີນຕໍ່ເປົ້າໝາຍ 2 ຄົນ ທີ່ຍັກຍອກຊັບຢູ່ສະຖາບັນການເງິນຈຸລະພາກທີ່ບໍ່ຮັບເງິນຝາກໄຊນິຍົມອຸດົມໄຊໄດ້ຢ່າງຂາດຕົວ.

ຫຼັງຈາກນັ້ນ ອົງການກວດກາລັດແຂວງ, ອົງການກວດກາລັດເມືອງ 7 ເມືອງ ຍັງໄດ້ແລກປ່ຽນຄໍາຄິດ-ຄໍາເຫັນ ແລະ ບົດຮຽນ ນໍາທິມງານກົມຕ້ານ ແລະ ສອບສວນການສໍ້ລາດບັງຫຼວງ ອົງການກວດກາແຫ່ງລັດຢ່າງກົງໄປກົງມາ ເພື່ອເຮັດໃຫ້ການຈັດຕັ້ງປະຕິບັດວຽກງານສະກັດກັ້ນ ແລະ ຕ້ານການສໍ້ລາດບັງຫຼວງຢູ່ແຂວງອຸດົມໄຊ ໄດ້ເຄື່ອນໄຫວຕາມພາລະບົດບາດ, ສິດ ແລະ ໜ້າທີ່ ໃຫ້ມີຄວາມເຂັ້ມແຂງຕໍ່ວຽກງານດັ່ງກ່າວ.

ໂດຍ: ສີແພງ ດາລາສະຫວັນ