ກອງປະຊຸມສະຫຼຸບວຽກງານກວດກາປະຈຳປີ 2024 ແລະ ວາງທິດທາງແຜນການ 2025 ຂອງເມືອງຄໍາເກີດ ແຂວງບໍລິຄຳໄຊ ໄດ້ຈັດຂຶ້ນໃນຕອນເຊົ້າຂອງວັນທີ 27 ພຶດສະພາ 2025 ນີ້ ທີ່ຫ້ອງປະຊຸມຫ້ອງວ່າການເມືອງຄຳເກີດ ໂດຍການເປັນປະທານຂອງສະຫາຍ ເພັດສະໃໝ ໄຊຍະທິຈັກ ເລຂາພັກເມືອງຄຳເກີດ, ສະຫາຍ ຄຳໝັ້ນ ໄຊຍະວົງ ຄະນະປະຈຳພັກເມືອງ, ປະທານຄະນະກວດກາພັກ, ປະທານອົງການກວດກາລັດເມືອງ ໂດຍມີຜູ້ເຮັດວຽກງານກວດກາແຕ່ລະໜ່ວຍພັກອ້ອມຂ້າງ ແລະ ບ້ານເທດສະບານ ເຂົ້າຮ່ວມ.​ໃນກອງປະຊຸມ ສະຫາຍ ກິ່ງ ວັນນາລາ ກໍາມະການພັກເມືອງ, ຮອງປະທານກວດກາພັກ-ລັດເມືອງ ໄດ້ຜ່ານບົດສະຫຼຸບຕີລາຄາການເຄື່ອນໄຫວວຽກງານກວດກາປະຈໍາປີ 2024 ແລະ ທິດທາງແຜນການ 2025 ເຊິ່ງສະຫາຍໄດ້ຍົກໃຫ້ເຫັນດ້ານດີຜົນສຳເລັດ ແລະ ດ້ານອ່ອນຂໍ້ຄົງຄ້າງ ໃນການຈັດຕັ້ງປະຕິບັດ 1 ປີທີ່ຜ່ານມາ ເປັນຕົ້ນແມ່ນຄະນະພັກ, ຄະນະກວດກາໄດ້ເອົາໃຈໃສ່ ນໍາພາ-ຊີ້ນໍາ ຕິດຕາມ, ກວດກາ ການຈັດຕັ້ງຜັນຂະຫຍາຍແນວ ທາງນະໂຍບາຍ, ມະຕິກອງປະຊຸມໃຫຍ່ຂອງຄະນະພັກຂັ້ນເທິງ ແລະ ຂັ້ນຕົນວາງອອກ ຢ່າງເປັນຮູບປະທໍາ, ສອດຫ້ອຍໃນວຽກງານຂອງແຕ່ລະຫ້ອງການ ແລະ ຮາກຖານບ້ານ; ຕິດຕາມ, ກວດກາການນໍາພາ-ຊີ້ນໍາຂອງຄະນະບໍລິຫານງານພັກເມືອງ ທີ່ມີຄວາມຮັບຜິດຊອບໃນແຕ່ລະຂະແໜງການພາຍໃນເມືອງ ແລະ ຮາກຖານບ້ານຢ່າງເປັນປົກກະຕິ ໂດຍຕິດພັນກັບການຕິດຕາມ, ຊຸກຍູ້ ໃນການແກ້ໄຂຫາງສຽງສັງຄົມຂອງແຕ່ລະຂົງເຂດ; ຕິດຕາມກວດກາການປະຕິບັດວິໄນ ຕໍ່ການຈັດຕັ້ງພັກ, ຄະນະພັກ ແລະ ສະມາຊິກພັກ ທີ່ລະເມີດກົດລະບຽບຂອງພັກ ໂດຍປະຕິບັດຕາມບົດແນະນໍາເພີ່ມເຕີມ ເລກທີ 194/ຄກສພ, ລົງວັນທີ 8 ກໍລະກົດ 2021 ແລະ ເເຈ້ງການເພີ່ມເຕີມ ສະບັບເລກທີ 119/ຄກພຂ.ບຊ, ລົງວັນທີ 10 ມີນາ 2022 ຜ່ານມາໄດ້ມີການປະຕິບັດວິໄນຕໍ່ສະມາຊິກພັກລະເມີດຈໍານວນ 07 ສະຫາຍ, ຍິງ 02 ສະຫາຍ ( ລະດັບການປະຕິບັດວິໄນ 02 ສະຫາຍແມ່ນລຶບຊື່ອອກຈາກພັກ, 5 ສະຫາຍແມ່ນໂຈະການຮ່ວມຊີວິດພັກຊົ່ວຄາວໃນໄລຍະເວລາ 06 ເດືອນ. ເຫດຜົນທີ່ຖືກປະຕິບັດວິໄນແມ່ນ ພວກກ່ຽວໄດ້ເຄື່ອນໄຫວຜິດຕໍ່ກົດລະບຽບຂອງພັກ ). ວຽກງານສະກັດກັ້ນ, ຕ້ານການສໍ້ລາດບັງຫຼວງຄະນະພັກ-ອົງການປົກຄອງ ແລະ ຄະນະກວດກາ ແຕ່ລະຂັ້ນ ໄດ້ເອົາໃຈໃສ່ສຶກສາອົບຮົມສະມາຊິກພັກ, ພະນັກງານ-ລັດຖະກອນ, ທະຫານ-ຕຳຫຼວດ ແລະ ປະຊາຊົນ ບັນດາເຜົ່າ ໃຫ້ຮັບຮູ້ ແລະ ເຂົ້າໃຈຕໍ່ຜົນຮ້າຍ ແລະ ໄພອັນຕະລາຍ ຂອງການສໍ້ລາດບັງຫຼວງ, ໂດຍການນຳພາຄົ້ນຄວ້າເຊື່ອມຊຶມເອກະສານ ນິຕິກໍາຕ່າງໆທີ່ກ່ຽວຂ້ອງກັບວຽກງານສະກັດກັ້ນ ແລະ ຕ້ານການສໍ້ລາດບັງຫຼວງ. ພ້ອມ​ທັງຍົກ​ໃຫ້​ເຫັນດ້ານ​ອ່ອນ-ຂໍ້​ຄົງ​ຄ້າງ ທີ່​ຈະຕ້ອງ​ຮີບຮ້ອນເອົາ​ໃຈ​ໃສ່ປັບ​ປຸງແກ້ໄຂຢ່າງເດັດຂາດ, ເຂັ້ມງວດ ແລະ ທັນສະພາບການ ເປັນ​ຕົ້ນ​ແມ່ນ ການແກ້ໄຂບັນຫາຫຍໍ້ທໍ້ທີ່ເກີດຂຶ້ນໃນກົງຈັກພັກ-ລັດ ແລະ ສະມາຊິກພັກ-ພະນັກງານແຕ່ລະຂັ້ນ ເພື່ອ​ເປັນ​ການ​ສະ​ກັດ​ກັ້ນ ແລະ ຕີ​ຖອຍ​ປະ​ກົດ​ການ​ຫຍໍ້​ທໍ້​ທີ່​ອາດ​ຈະ​ເກີດ​ຂຶ້ນໃນຕໍ່ໜ້າ.

ພ້ອມດຽວກັນນັ້ນຜູ້ເຂົ້າຮ່ວມກອງປະຊຸມກໍ່ໄດ້ປະກອບຄໍາຄິດເຫັນໃສ່ຮ່າງບົດສະຫຼຸບຢ່າງກົງໄປກົງມາ, ຈາກນັ້ນ ສະຫາຍ ດວງມະນີ ສີບຸນເຮືອງ ຮອງຫົວໜ້າຫ້ອງການພາຍໃນເມືອງ ໄດ້ຂຶ້ນຜ່ານຂໍຕົກລົງວ່າດ້ວຍການຍ້ອງຍໍ ຈໍານວນ 11 ໃບໃຫ້ຜູ້ທີ່ມີຜົນງານດີເດັ່ນໃນການເຄື່ອນໄຫວປະຕິບັດໜ້າທີ່ວຽກງານກວດກາພັກ-ລັດປະຈໍາປີ 2024 ໃຫ້ກຽດມອບໂດຍ ສະຫາຍ ເພັດສະໃໝ ໄຊຍະທິຈັກ ເລຂາພັກເມືອງຄໍາເກີດ.