ໃນຕອນເຊົ້າຂອງວັນທີ 26 ພຶດສະພາ 2025 ຄະນະກວດກາພັກ ອົງການໄອຍະການປະຊາຊົນສູງສຸດ ໄດ້ດໍາເນີນກອງປະຊຸມ ສະຫຼຸບວຽກງານກວດກາປະຈໍາປີ 2024 ແລະ ທິດທາງແຜນການປະຈໍາປີ 2025 ຂຶ້ນຢູ່ທີ່ຫ້ອງປະຊຸມໃຫຍ່ ອົງການໄອຍະການປະຊາຊົນສູງສຸດ ໃຫ້ກຽດເປັນປະທານຮ່ວມຂອງ ສະຫາຍ ໄຊຊະນະ ໂຄດພູທອນ ກຳມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າອົງການໄອຍະການປະຊາຊົນສູງສຸດ ແລະ ສະຫາຍ ວິໄລວັນ ບຸດດາຄໍາ ກໍາມະການສໍາຮອງສູນກາງພັກ ,ຮອງປະທານຄະນະກວດກາສູນກາງພັກ,ຮອງປະທານກວດກາແຫ່ງລັດ,ຮອງຫົວໜ້າອົງການ ຕ້ານການສໍ້ລາດບັງຫຼວງຂັ້ນສູນກາງ ມີບັນດາສະຫາຍຄະນະພັກ-ຄະນະນໍາ ອົງການໄອຍະການປະຊາຊົນສູງສຸດ, ຄະນະກວດກາພັກ, ຫົວໜ້າຮອງຫົວໜ້າຫ້ອງການ, ຫົວໜ້າຮອງຫົວໜ້າບັນດາກົມ, ສະຖາບັນຄົ້ນຄວ້າ ແລະ ຝຶກອົບຮົມໄອຍະການ, ຕາງໜ້າຈາກຄະນະກວດກາສູນກາງພັກ, ບັນດາຫົວໜ້າພະແນກ ແລະ ພະນັກງານຫຼັກແຫຼ່ງ ອົງການໄອຍະການປະຊາຊົນສູງສຸດ ເຂົ້າຮ່ວມຢ່າງພ້ອມພຽງ.
ໃນກອງປະຊຸມ ສະຫາຍ ຄໍານຸທອນ ສູນວິເລີດ ຮອງປະທານກວດກາພັກ, ຫົວໜ້າກົມກວດກາ ອົງການໄອຍະການປະຊາຊົນສູງສຸດ ໄດ້ຂື້ນຜ່ານບົດສະຫຼຸບຕີລາຄາການເຄື່ອນໄຫວວຽກງານກວດກາຂອງອົງການໄອຍະການປະຊາຊົນສູງສຸດ ປະຈຳປີ 2024 ແລະ ທິດທາງວຽກງານຈຸດສຸມ ປະຈໍາປີ 2025. ໂດຍທ່ານໄດ້ຊີ້ໃຫ້ເຫັນຜົນສໍາເລັດໃນການເຄື່ອນໄຫວ ແລະ ຈັດຕັ້ງປະຕິບັດຕົວຈິງໃນ1 ປີ ຜ່ານມາ ເຫັນວ່າມີຫຼາຍດ້ານໄດ້ຮັບຜົນສໍາເລັດຢ່າງຕັ້ງໜ້າ ແລະ ມີບາງດ້ານກາຍເປັນສີ່ງທ້າທາຍໃນການຈັດຕັ້ງປະຕິບັດວຽກງານກວດກາຢູ່ ອົງການໄອຍະການປະຊາຊົນສູງສຸດ ພ້ອມດຽວກັນນັ້ນກໍ່ຍັງຍົກໃຫ້ເຫັນບົດຮຽນທີ່ຖອດຖອນໄດ້ໃນວຽກງານກວດກາໃນໄລຍະຜ່ານມາ.
ພ້ອມນີ້ ສະຫາຍ ນາງ ພອນເພັດ ອຸ່ນແກ້ວ ກໍາມະການຄະນະບໍລິຫານງານພັກ,ຮອງຫົວໜ້າອົງການໄອຍະການປະຊາຊົນສູງສຸດ ໄດ້ເຜີຍແຜ່ບັັນດາເອກະສານສໍາຄັນທີ່ຕິດພັນກັບວຽກງານກວດກາຈໍານວນໜຶ່ງ ເປັນຕົ້ນແມ່ນ ບົດບັນທຶກກອງປະຊຸມ 4 ພາກສ່ວນ ລະຫວ່າງ ອົງການກວດກາແຫ່ງລັດ, ກະຊວງປ້ອງກັນຄວາມສະຫງົບ, ກະຊວງຍຸຕິທຳ ແລະ ອົງການໄອຍະການປະຊາຊົນສູງສຸດ ໃນການດໍາເນີນຄະດີການສໍ້ລາດບັງຫຼວງ ສະບັບລົງວັນທີ 29 ມັງກອນ 2024; ລະບຽບວ່າດ້ວຍການເກັບຮັກສາເອກະສານກ່ຽວກັບການກວດກາ ສະບັບເລກທີ 138/ອກຫລ, ລົງວັນທີ 9 ເມສາ 2024.
ຈາກນັ້ນ, ບັນດາຜູ້ແທນກອງປະຊຸມກໍ່ໄດ້ພັດປ່ຽນກັນປະກອບຄໍາເຫັນໃສ່ເນື້ອໃນບົດສະຫຼຸບ ແລະ ໄດ້ແລກປຽ່ນຄໍາຄິດເຫັນເຊິ່ງກັນ ແລະ ກັນຢ່າງກົງໄປກົງມາ ໃນການຈັດຕັ້ງປະຕິບັດວຽກງານກວດກາແຕ່ລະພາກສ່ວນ ຕະຫຼອດໄລຍະ 1 ປີ ຜ່ານມາ.
ໃນໂອກາດທີ່ມີຄວາມໝາຍສໍາຄັນນີ້ ສະຫາຍ ວິໄລວັນ ບຸດດາຄໍາ ກໍ່ໄດ້ໃຫ້ກຽດໂອ້ລົມ ແລະ ເໜັ້ນໜັກບາງບັນຫາທີ່ສໍາຄັນເປັນຕົ້ນແມ່ນ ຄະນະກວດກາ ອົງການໄອຍະການສູງສຸດ ຕ້ອງເພີ່ມທະວີວຽກງານການເມືອງແນວຄິດ ແລະ ເອົາໃຈໃສ່ໃນການສຶກສາອົບຮົບ ສະມາຊິກພັກ, ພະນັກງານ ໃຫ້ມີຄວາມອຸ່ນອຽນທຸ່ນທ່ຽງ ແລະ ໃຫ້ຖືເອົາວຽກງານກວດກາຕິດພັນໃນການນໍາພາ-ຊີ້ນໍາຂອງຄະນະພັກແຕ່ລະຂັ້ນ ແລະ ໃຫ້ວຽກງານດັ່ງກ່າວສອດຫ້ອຍເຂົ້າໃນທຸກຂົງເຂດວຽກງານ, ຄະນະໜ່ວຍພັກ ຕ້ອງເອົາໃຈໃສ່ໃນການເຮັດວຽກງານກວດກາໃຫ້ເຂັ້ມງວດ ແລະ ເປັນປົກກະຕິ ເພື່ອກຳສະພາບຂອງພະນັກງານໃຫ້ດີ ແລະ ເປັນເຈົ້າການໃນການ ດຳເນີນການກວດກາ ໃນກໍລະນີມີບັນຫາ ແລະ ແກ້ໄຂຜົນຂອງການກວດກາໃຫ້ໄວ ແລະ ທັນການ ພ້ອມດຽວກັນນັ້ນ ຍັງໄດ້ຮຽກຮ້ອງໃຫ້ຜູ້ແທນກອງປະຊຸມແຕ່ລະສະຫາຍ ຈົ່ງເຊີດຊູຄວາມຮັບຜິດຊອບຂອງຕົນເຮັດໃຫ້ຫຼ້ອນໜ້າທີ່ໆພັກ, ລັດ ແລະ ປະຊາຊົນມອບໝາຍໃຫ້, ນຳເອົາເນື້ອໃນຈິດໃຈຂອງກອງປະຊຸມໃນຄັ້ງນີ້ ໄປຈັດຕັ້ງຜັນຂະຫຍາຍ ເຂົ້າໃນວຽກງານຕົວຈິງ ຢ່າງມີຜົນສຳເລັດ, ສ້າງຄວາມເປັນເອກະພາບທາງດ້ານແນວຄິດ ແລະ ການກະທຳ, ປະຕິບັດໜ້າທີ່ວຽກງານດ້ວຍຄວາມຮັບຜິດຊອບ, ເພີ່ມທະວີດ້ານຈັນຍາບັນ, ຈັນຍາທຳ, ຮັບປະກັນຄວາມໂປ່ງໃສ ແລະ ຍຸຕິທໍາຖືກຕ້ອງ ແລະ ສອດຄ່ອງຕາມທີ່ກົດໝາຍກໍານົດໄວ້.
