ໃນກອງປະຊຸມ ສະຫາຍ ລຳທອງ ຂອບສີລາວົງ ປະທານຄະນະກວດກາພັກແຂວງສະຫວັນນະເຂດ ໄດ້ຜ່ານບົດສະຫຼຸບຕີລາຄາການຈັດຕັ້ງປະຕິບັດວຽກງານກວດກາທົ່ວແຂວງສະຫວັນນະເຂດ ປະຈຳປີ 2024 ແລະ ທິດທາງແຜນການ ປີ 2025 ໂດຍມີຜົນສໍາເລັດຫຼາຍດ້ານເປັນຕົ້ນ: ຄະນະພັກ, ຄະນະນໍາ ໄດ້ຖືເອົາວຽກງານສຶກສາອົມຮົບການເມືອງແນວຄິດ ເປັນວຽກສຳຄັນຕົ້ນຕໍ ໂດຍຫັນເອົາບັນດາມະຕິ, ຄຳສັ່ງ, ລະບຽບຂອງພັກ, ກົດໝາຍຂອງລັດ ແລະ ບັນດາບົດແນະນຳຕ່າງໆ ເຜີຍແຜ່ເຊື່ອມຊືມໃຫ້ແກ່ ຄະນະພັກ, ຄະນະກວດກາແຕ່ລະຂັ້ນ ຕະຫຼອດຮອດສະມາຊິກພັກ-ພະນັກງານໃນຂັ້ນຄຸ້ມຄອງຂອງຕົນຢ່າງທົ່ວເຖິງ. ດ້ານວຽກງານຕິດຕາມ, ກວດກາການບໍລິຫານລັດ ແລະ ຕິດຕາມຜົນຂອງການກວດກາ ໄດ້ຮ່ວມກັບຄະນະກຳມະການຈາກສູນກາງ ດຳເນີນການກວດກາເຂດເສດຖະກິດພິເສດ, ໄດ້ກວດກາການນຳເຂົ້າ ແລະ ເສຍພາສີລົດ ແຕ່ປີ 2019-2023 ເຊິ່ງໄດ້ອາຍັດພາຫານະ (ລົດໃຫຍ່) ຈໍານວນ 13 ຄັນ, ໄດ້ຕິດຕາມ, ກວດກາ ບັນດາໂຄງການລົງທຶນຂອງລັດ ເລີ່ມແຕ່ຫົວທີ ປະຈຳປີ 2024 ທັງໝົດ 16 ໂຄງການ ມູນຄ່າລວມໂຄງການສະພາຮັບຮອງທັງໝົດ 68,57 ຕື້ກີບ; ວຽກງານຕ້ານ, ສະກັດກັ້ນ ແລະ ສອບສວນການສໍ້ລາດບັງຫຼວງ ໄດ້ຕິດຕາມການເກັບກູ້ຊັບສິນ 10 ເປົ້າໝາຍ ມູນຄ່າເສຍຫາຍທັງໝົດ 18,432,873,644 ກີບ ເກັບກູ້ໄດ້ແລ້ວ 1,272,267,266 ກີບ ແລະ ຍັງເກັບກູ້ບໍ່ໄດ້ 17,160,606,378 ກີບ, 52,590,840 ບາດ, 100,011.23 ໂດລາ, ໃນນີ້ຢູ່ທະນາຄານພັດທະນາລາວ ມູນຄ່າ 11,068,113,257 ກີບ, 52,590,840 ບາດ, 100,011.23 ໂດລາ, ຢູ່ບັນດາພະແນກການ 2 ເປົ້າໝາຍ ມູນຄ່າ 1,655,154,794 ກີບ ແລະ ບັນດາເມືອງ-ນະຄອນ 7 ເປົ້າໝາຍ ມູນຄ່າ 4,437,338,327 ກີບ; ສົ່ງສຳນວນຄະດີໃຫ້ອົງການໄອຍະການປະຊາຊົນແຂວງແລ້ວ 6 ຄົນ, ຍັງ 4 ຄົນ.

ເພື່ອເຮັດໃຫ້ວຽກງານກວດກາມີການເຄື່ອນໄຫວຢ່າງແຂງແຮງ, ຕັ້ງໜ້າ ແລະ ຖືກທິດ ສະຫາຍ ຄຳພັນ ພົມມະທັດ ກໍໄດ້ໂອ້ລົມຕໍ່ກອງປະຊຸມ ໂດຍໄດ້ເນັ້ນໜັກ ແລະ ຍົກໃຫ້ເຫັນເຖິງຄວາມສຳຄັນຂອງວຽກງານຕິດຕາມ, ກວດກາ ທີ່ຕັ້ງ, ພາລະບົດບາດ ແລະ ການເລັ່ງທວງທີ່ຮີບດ່ວນຂອງສັງຄົມໃນປະຈຸບັນ ຄະນະພັກທຸກຂັ້ນ ຕ້ອງເພີ່ມທະວີການນໍາພາ-ຊີ້ນໍາເອົາໃຈໃສ່ຕໍ່ການຕິດຕາມ-ກວດກາໂດຍປະຕິບັດຕາມຈິດໃຈ ເຮັດຮອດໃສ ກວດກາຮອດຫັ້ນ ເຫັນການລະເມີດຢູ່ບ່ອນໃດ ກໍ່ແກ້ໄຂໃຫ້ເດັດຂາດທັນການ, ບໍ່ປະໃຫ້ຄຸມເຄືອແກ່ຍາວ; ເອົາໃຈໃສ່ກວດກາລົງເລິກການປະຕິບັດກົດໝາຍ, ພາລະບົດບາດ, ສິດໜ້າທີ່ ແລະ ຄວາມຮັບຜິດຊອບການເມືອງຂອງການຈັດຕັ້ງ, ສະມາຊິກພັກ-ພະນັກງານ ໂດຍສະເພາະພະນັກງານຂັ້ນນໍາພາ-ຄຸ້ມຄອງຢູ່ແຕ່ລະຂັ້ນ ທີ່ມີການລະເມີດກົດລະບຽບຂອງພັກ ແລະ ກົດໝາຍຂອງລັດ ເພື່ອແກ້ໄຂໃຫ້ເດັດຂາດ, ທັນການ; ປັບປຸງກົງຈັກການຈັດຕັ້ງ ຄະນະກວດກາແຕ່ລະຂັ້ນ ໃຫ້ໜັກແໜ້ນ, ເຂັ້ມແຂງ ຄະນະພັກ ແລະ ອົງການກວດກາແຕ່ລະຂັ້ນຕ້ອງເປັນເຈົ້າການດໍາເນີນການປັບປຸງພາລະບົດບາດ, ບູລະນະກົງຈັກການຈັດຕັ້ງ, ສັບຊ້ອນ ແລະ ຍົກລະດັບບຸກຄະລາກອນ ແຕ່ລະຕໍາແໜ່ງງານໃຫ້ຈະແຈ້ງ; ສົມທົບການກໍ່ສ້າງ-ຝຶກອົບຮົມຕາມຫຼັກສູດ ແລະ ການຈັດຕັ້ງສໍາມະນາຖອດຖອນບົດຮຽນຈາກພຶດຕິກໍາຕົວຈິງ ເພື່ອຮັບປະກັນຄວາມໂປ່ງໃສໃນການເຄື່ອນໄຫວສະກັດກັ້ນ ແລະ ແກ້ໄຂປະກົດການຫຍໍ້ທໍ້ໃນຖັນແຖວພະນັກງານກວດກາ ເມື່ອມີບັນຫາປະກົດການຫຍໍ້ທໍ້ເກີດຂຶ້ນໃນຂອບເຂດຄວາມຮັບຜິດຊອບຂອງຕົນ ຕ້ອງເປັນເຈົ້າການກວດກາແກ້ໄຂຢ່າງທັນການ ແລະ ຂາດຕົວ, ບໍ່ລໍຖ້າ ຫຼື ເອື່ອຍອີງຂັ້ນເທິງອີກ. ພ້ອມນັ້ນ, ຄະນະພັກ, ອົງການປົກຄອງ ຕ້ອງສ້າງເງື່ອນໄຂດ້ານຕ່າງໆໃຫ້ຄະນະກວດກາຂັ້ນຕົນ ສາມາດເຄື່ອນໄຫວປະຕິບັດພາລະບົດບາດຂອງຕົນ ຢ່າງມີປະສິດທິຜົນ; ຄະນະກວດກາແຕ່ລະຂັ້ນກໍ່ຕ້ອງເປັນເຈົ້າການສ້າງແຜນການເຄື່ອນໄຫວ ແລະ ສະເໜີຂັ້ນເທິງພິຈາລະນາແກ້ໄຂໃຫ້ທັນເວລາ.