ໃນພິທີ ສະຫາຍ ນາງ ພອນວັນ ອຸທະວົງ ໄດ້ກ່າວເປີດກອງປະຊຸມສະຫຼຸບຕີລາຄາວຽກງານກວດກາ ປະຈຳປີ 2024 ແລະ ທິດທາງແຜນການ ປີ 2025 ຂອງ ກະຊວງແຜນການ ແລະ ການລົງທຶນ. ເຊິ່ງກອງປະຊຸມຄັ້ງນີ້ແມ່ນໄດ້ຈັດຂຶ້ນ ໃນທ່າມກາງບັນຍາກາດທີ່ທົ່ວພັກ, ທົ່ວກອງທັບ ແລະ ປວງຊົນລາວທັງຊາດກຳລັງສະເຫຼີມສະຫຼອງຜົນສຳເລັດ ແລະ ອອກແຮງຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ຄັ້ງທີ XI ຂອງພັກ. ນອກຈາກນີ້, ສະຫາຍ ຍັງຮຽກຮ້ອງມາຍັງຄະນະພັກ, ຄະນະນຳແຕ່ລະຂັ້ນ, ສະມາຊິກພັກ-ພະນັກງານຫຼັກແຫຼ່ງ ຈົ່ງໄດ້ພ້ອມກັນເພີ່ມຄວາມເອົາໃຈໃສ່ຕໍ່ວຽກງານຕິດຕາມ, ກວດກາ ຕາມພາລະບົດບາດ, ໜ້າທີ່ ແລະ ຂອບເຂດສິດທີ່ໄດ້ກຳນົດໄວ້ໃນກົດລະບຽບຂອງພັກ ແລະ ກົດໝາຍຂອງລັດ ໃຫ້ຫຼາຍຂຶ້ນເລື້ອຍໆ ເພື່ອເຮັດໃຫ້ວຽກງານກວດກາຂອງ ກະຊວງແຜນການ ແລະ ການລົງທຶນ ໃຫ້ມີຄຸນນະພາບ, ເຂັ້ມແຂງ ແລະ ທັນສະໄໝເທື່ອລະກ້າວ. ພ້ອມດຽວກັນນີ້, ສະຫາຍ ພູວົງ ພິມມະສອນ ກຳມະການຄະນະບໍລິຫານງານພັກ, ຮອງປະທານຄະນະກວດກາພັກ, ຫົວໜ້າກົມກວດກາ ກະຊວງ ຜແຜນການ ແລະ ການລົງທຶນ ກໍ່ໄດ້ຜ່ານຮ່າງບົດສະຫຼຸບຕີລາຄາວຽກງານກວດກາ ປະຈໍາປີ 2024 ແລະ ທິດທາງແຜນການ ປີ 2025 ຂອງ ກະຊວງແຜນການ ແລະ ການລົງທຶນ ຜູ້ແທນກອງປະຊຸມຍັງໄດ້ປະກອບຄໍາຄິດ, ຄຳເຫັນຕໍ່ຮ່າງບົດສະຫຼຸບດັ່ງກ່າວ. ຫຼັງຈາກນັ້ນ, ສະຫາຍ ປອ. ດາວບົວລະພາ ບາວົງເພັດ ກໍ່ໄດ້ເຜີຍແຜ່ບັນດາເອກະສານທີ່ສຳຄັນອື່ນໆຕື່ມອີກ.

ຕອນທ້າຍຂອງກອງປະຊຸມ ສະຫາຍ ນາງ ພອນວັນ ອຸທະວົງ ກໍ່ໄດ້ມີຄຳເຫັນໂອ້ລົມ ໂດຍເນັ້ນໜັກໃຫ້ຍົກສູງຄຸນນະພາບຂອງວຽກງານກວດກາ ແລະ ຕ້ານການສໍ້ລາດບັງຫຼວງ ໃຫ້ດີຂຶ້ນກວ່າເກົ່າ ສາມາດຕອບສະໜອງໄດ້ກັບຄວາມຮຽກຮ້ອງຕ້ອງການໜ້າທີ່ການເມືອງໃນໄລຍະໃໝ່ ທັງເປັນການກະຕຸກຊຸກຍູ້ການເຄື່ອນໄຫວວຽກງານຂອງບັນດາກົມກອງ ພາຍໃນກະຊວງແຜນການ ແລະ ການລົງທຶນ ໃນການຈັດຕັ້ງປະຕິບັດຕາມແນວທາງນະໂຍບາຍຂອງພັກ ແລະ ສອດຄ່ອງກັບກົດໝາຍຂອງລັດ ເຮັດໃຫ້ການເຄື່ອນໄຫວວຽກງານມີຄວາມໂປ່ງໃສ, ສາມາດກວດກາໄດ້ ແລະ ໃຫ້ມີປະສິດທິພາບຂຶ້ນເລື່ອຍໆ.