ໃນວັນທີ 13 ມີນາ 2025 ທ່ານ ສີໄນ ມຽງລາວັນ ຮອງປະທານຄະນະກວດກາສູນກາງພັກ, ຮອງປະທານອົງການກວດກາແຫ່ງລັດ ພ້ອມດ້ວຍຄະນະ ໄດ້ລົງເຄື່ອນໄຫວເຮັດວຽກຢູ່ ແຂວງບໍລິຄຳໄຊ ເຊິ່ງໃຫ້ກຽດຕ້ອນຮັບໂດຍ ທ່ານ ປອ ດວງຕາ ມໍລະຄາສຸກ ຄະນະປະຈຳພັກແຂວງ, ປະທານຄະນະກວດກາພັກ, ອົງການກວດກາລັດແຂວງ ພ້ອມດ້ວຍຄະນະພັກ-ຄະນະນຳ ແລະ ພະນັກງານ-ລັດຖະກອນພາຍໃນຄະນະກວດກາພັກແຂວງ.

ການລົງມາເຄື່ອນໄຫວວຽກງານຢູ່ແຂວງ ບໍລິຄໍາໄຊ ໃນຄັ້ງນີ້ກໍເພື່ອເປັນການຕິດຕາມ, ຊຸກຍູ້ການປັບປຸງກົງຈັກການຈັດຕັ້ງ, ພາລະບົດບາດ ແລະ ການກຳນົດຕຳແໜ່ງງານຢູ່ ຄະນະກວດກາພັກ, ອົງການກວດກາລັດແຕ່ລະຂັ້ນພາຍໃນແຂວງ. ໂອກາດນີ້ ຍັງໄດ້ ຮັບຟັງ ການລາຍງານກ່ຽວກັບການປັບປຸງ ກົງຈັກການຈັດຕັ້ງ, ພາລະບົດບາດ ແລະ ການກຳນົດຕຳແໜ່ງງານ ຕາມຮ່າງຄຳຖາມເຈາະຈິ້ມ ຂອງຄະນະກວດກາສູນກາງພັກ ຈາກ ທ່ານ ຄຳຕັນ ສີສົມຈິດ ຮອງປະທານຄະນະກວດກາພັກ, ຮອງປະທານອົງການກວດກາລັດແຂວງ ເຊິ່ງທ່ານໃຫ້ຮູ້ວ່າ ປັດຈຸບັນ ການຄົ້ນຄວ້າປັງປຸງກົງຈັກການຈັດຕັ້ງ, ການກຳນົດພາລະບົດບາດ, ສິດ ແລະ ໜ້າທີ່ ຂອງຄະນະກວດກາພັກ, ອົງການກວດກາລັດແຂວງ ແລະ ເມືອງ ແມ່ນໄດ້ປັບປຸງສຳເລັດແລ້ວ; ການກຳນົດຕຳແໜ່ງງານຢູ່ພາຍໃນຄະນະກວດກາພັກ, ອົງການກວດກາລັດແຂວງ ແມ່ນໄດ້ປັງປຸງສຳເລັດແລ້ວ ສຳລັບ ຄະນະກວດກາພັກ, ອົງການກວດກາລັດ 07 ເມືອງ ພາຍໃນແຂວງແມ່ນຍັງບໍ່ທັນສຳເລັດ ໃນນັ້ນ: ສະເໜີຫາຂັ້ນເທິງຄົ້ນຄວ້າຮັບຮອງ 05 ເມືອງ ແລະ ກຳລັງຄົ້ນຄວ້າຂຽນຢູ່ໃນຂັ້ນຕົນ 02 ເມືອງ ;ນອກນີ້ທ່ານຍັງໃຫ້ຮູ້ຕື່ມອີກວ່າ ກ່ຽວກັບ ການບຳລຸງສ້າງ ແລະ ຊັບຊ້ອນພະນັກງານກວດກາ ເຂົ້າໃນກົງຈັກການຈັດຕັ້ງໃນແຕ່ລະຂັ້ນພາຍໃນແຂວງ ອີງຕາມຂໍ້ມູນທີ່ເກັບກຳໃນປີ 2024 ທົ່ວແຂວງບໍລິຄຳໄຊມີພະນັກງານກວດກາອາຊີບທັງໝົດ 159 ທ່ານ, ຍິງ 49 ທ່ານ, ໃນນັ້ນ: ສັງກັດຢູ່ຄະນະກວດກາພັກແຂວງ 28 ທ່ານ, ຍິງ 08 ທ່ານ; ຢູ່ບັນດາພະແນກການອ້ອມຂ້າງແຂວງ 76 ທ່ານ, ຍິງ 23 ທ່ານ ແລະ ຢູ່ຄະນະກວດກາພັກບັນດາເມືອງ 55 ທ່ານ, ຍິງ 18 ທ່ານ.

ໃນຕອນທ້າຍຂອງພິທີ ທ່ານ ສີໄນ ມຽງລາວັນ ຍັງໄດ້ໂອ້ລົມຕໍ່ກອງປະຊຸມ ເຊິ່ງກ່ອນອື່ນທ່ານໄດ້ຍ້ອງຍໍຊົມເຊີຍຕໍ່ການຈັດຕັ້ງປະຕິບັດວຽກງານກວດກາ, ໂດຍສະເພາະການປັບປຸງກົງຈັກການຈັດຕັ້ງ, ພາລະບົດບາດ, ການກໍານົດຕໍາແໜ່ງງານ, ການບໍາລຸງສ້າງພະນັກງານດວດກາ ຢູ່ພາຍໃນແຂວງ ໃນໄລຍະຫນື່ງປີຜ່ານມາ ລວມເຖິງການກະກຽມ ແລະ ດໍາເນີນກອງປະຊຸມວຽກງານກວດກາທົ່ວແຂວງປະຈໍາປີ 2024 ຕິດພັນກັບການຈັດຕັ້ງຜັນຂະຫຍາຍເນື້ອໃນກອງປະຊຸມວຽກງານກວດກາທົ່ວປະເທດ ແລະ ໄດ້ມີຄຳເຫັນເນັ້ນບາງບັນຫາເພື່ອເປັນທິດທາງໃນການສືບຕໍ່ຈັດຕັ້ງປະຕິບັດໃນຕໍ່ໜ້າ ເປັນຕົ້ນ ໃຫ້ສືບຕໍ່ການກະກຽມ ແລະ ດຳເນີນກອງປະຊຸມໃຫຍ່ຂອງແຂວງ, ກວດກາການປະຕິບັດພາລະບົດບາດຂອງບັນດາພະແນກການ-ອົງການອ້ອມຂ້າງແຂວງ ເພື່ອໃຫ້ເປັນບ່ອນອີງໃນການລົງຕິດຕາມ, ກວດກາການປະຕິບັດໜ້າທີ່ຂອງບັນດາພະແນກການ; ສືບຕໍ່ຕິດຕາມ ແລະ ນຳພາການປັງປຸງກົງຈັກການຈັດຕັ້ງ, ພາລະບົດບາດ ແລະ ຂໍ້ກຳນົດຕຳແໜ່ງງານ ຂອງຄະນະກວດກາພັກຂັ້ນລຸ່ມທີ່ຍັງບໍ່ທັນສຳເລັດ ໃນນັ້ນໃຫ້ຄະນະກວດກາພັກແຂວງ ຈັດຕັ້ງຜັນຂະຫຍາຍຕາມ ແຈ້ງການສະບັບເລກທີ 47/ຄກສພ. ໃນໂອກາດດຽວກັນນີ້ ທ່ານ ສີໄນ ມຽງລາວັນ ກໍ່ໄດ້ຕາງໜ້າຄະນະພັກ, ຄະນະນໍາ ຄະນະກວດກາສູນກາງພັກມອບອຸປະກອນຮັບໃຊ້ຫ້ອງການ ປະເພດຄອມພິວເຕີ ແລະ ເຄື່ອງພິມເອກະສານ ຈຳນວນ 02 ຊຸດໃຫ້ຄະນະກວດກາພັກແຂວງ ເພື່ອນໍາໄປມອບຕໍ່ໃຫ້ບັນດາ ຄະນະກວດກາພັກເມືອງ ທີ່ຍັງຂາດເຂີນອຸປະກອນດັ່ງກ່າວອີກດ້ວຍ.ພາບ-ຂ່າວໂດຍ: ຂັນພະລັກ ອິນປັນຍາ ຄະນະກວດກາແຂວງບໍລິຄຳໄຊ