ຕອນເຊົ້າ ຂອງວັນທີ 20 ກຸມພາ 2025 ນິ້, ໜ່ວຍພັກຄະນະກວດກາເມືອງສໍາພັນ ແຂວງຜົ້ງສາລີ ໄດ້ຈັດພິທີມອບ-ຮັບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ຄັ້ງທີ III ປະຈໍາປີ 2023 ຂຶ້ນທີ່ຫ້ອງປະຊຸມຂອງຄະນະກວດກາເມືອງ ໂດຍການເປັນປະທານຂອງ ສະຫາຍ ທອງຕື ເກຍສະບົງ ກໍາມະການພັກແຂວງ, ເລຂາພັກເມືອງ, ເຈົ້າເມືອງ, ມີເລຂາໜ່ວຍພັກ, ຄະນະໜ່ວຍພັກ ມາຈາກຄະນະຈັດຕັ້ງເມືອງ ບັນດາສະຫາຍສະມາຊິກພັກພາຍໃນໜ່ວຍພັກເຂົ້າຮ່ວມ.

​ໃນພິທີ ສະຫາຍ ນາງ ຄໍາເຫຼັກ ຄົງໄພວັນ, ຮອງເລຂາໜ່ວຍພັກ, ຮອງປະທານກວດກາພັກ, ຮອງປະທານອົງການກວດກາລັດເມືອງ ໄດ້ຜ່ານບົດສະຫຼຸບຕີລາຄາການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2023 ແລະ ທິດທາງແຜນການປະຈໍາປີ 2024, ເຊິ່ງສະຫາຍໄດ້ຍົກເຫັນຜົນງານການຈັດຕັ້ງປະຕິບັດແຜນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ຂອງໜ່ວຍພັກ ໃນໄລຍະ 1 ປີຜ່ານມາ ເຫັນໄດ້ວ່າ ຄະນະໜ່ວຍພັກ ໄດ້ເອົາໃຈໃສ່ຕໍ່ການນໍາພໍາ-ຊີ້ນໍາ ສະມາຊິກພັກພາຍໃນໜ່ວຍພັກ ເຄື່ອນໄຫວຕາມພາລະບົດບາດ, ສິດ ແລະ ໜ້າທີ່ຂອງຕົນ, ເປັນເສນາທິການໃຫ້ຄະນະປະຈໍາພັກເມືອງ, ການຈັດຕັ້ງປະຕິບັດກົດລະບຽບຂອງພັກ ສະໄໝທີ XI ມະຕິກອງປະຊຸມໃຫຍ່ຄັ້ງທີ XIV ຂອງອົງຄະນະພັກເມືອງ ແລະ ມະຕິກອງປະຊຸມໃຫຍ່ຄັ້ງທີ I ຂອງໜ່ວຍພັກຄະນະກວດກາເມືອງ, ໂດຍຍືດໝັ້ນປະຕິບັດຕາມ 5 ຫຼັກການ ແລະ 3 ທິດນໍາຂອງພັກ ແລະ 3 ຮູບການຂອງວຽກງານກວດກາ, ໃນການກໍ່ສ້າງພັກ-ພະນັກງານຢ່າງໜັກແໜ້ນ, ເຂັ້ມແຂງ ການເຄື່ອນໄຫວຈັດຕັ້ງປະຕິບັດວຽກງານ, ແຕ່ລະໄລຍະ, ມີການສະຫຼຸບຕີລາຄາ ປະເມີນຜົນ ການຈັດຕັ້ງປະຕິບັດແຜນການນໍາພາ-ຊີ້ນໍາວຽກງານຮອບດ້ານ ແລະ ວາງທິດທາງແຜນການໃນຕໍ່ໜ້າ, ມີການສະຫຼຸບຖອດຖອນບົດຮຽນ, ມີການສ່ອງແສງໃຫ້ຄະນະພັກຂັ້ນເທິງເປັນປົກກະຕິ, ເຮັດວຽກປະຕິບັດຫຼັກການລວມສູນປະຊາທິປະໄຕ, ນໍາພາເປັນໝູ່ຄະນະ ແລະ ມອບວຽກງານໃຫ້ບຸກຄົນຮັບຜິດຊອບ, ຢ່າງຈະແຈ້ງ, ສຽງສ່ວນໜ້ອຍຂຶ້ນກັບສຽງສ່ວນຫຼາຍ, ບຸກຄົນຂຶ້ນກັບການຈັດຕັ້ງ, ມີການຕິດຕາມ, ກວດກາ ແລະ ຊຸກຍູ້ເປັນປົກກະຕິ, ມີການປະສານສົມທົບຂະແໜງການທີ່ກ່ຽວຂ້ອງຢ່າງກົມກຽວ, ເຮັດໃຫ້ການນໍາພາ, ການເສີມຂະຫຍາຍພາລະບົດບາດ, ສິດ ແລະ ໜ້າທີ່ຂອງພັກ, ໂດຍຍືດໜັ້ນອຸດົມການຂອງພັກ, ດ້ວຍຫຼາຍຮູບຫຼາຍສີ, ພ້ອມທັງເຊື່ອມຊຶມບັນດານິຕິກຳຂອງພັກ, ກົດໝາຍຂອງລັດ, ເຮັດໃຫ້ພັກປອດໃສ, ເຂັ້ມແຂງ, ໜັກແໜ້ນທຸກດ້ານ;

ຈາກນັ້ນ ສະຫາຍ ນາງ ຄີນ ຈັນທະວົງ ຫົວໜ້າໜ່ວຍງານກໍ່ສ້າງພັກ-ພະນັງງານຄະນະຈັດຕັ້ງເມືອງ ໄດ້ຜ່ານມະຕິຕົກລົງ ຂອງຄະນະປະຈໍາພັກເມືອງ ສະບັບເລກທີ 155/ຄພມ, ລົງວັນທີ 21 ຕຸລາ 2024 ວ່າດ້ວຍການອະນຸມັດມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2023.ຕອນທ້າຍຂອງພິທີ ສະຫາຍ ທອງຕື ເກຍສະບົງ ກໍາມະການພັກແຂວງ, ເລຂາພັກເມືອງ, ເຈົ້າເມືອງເມືອງສໍາພັນ ແຂວງຜົ້ງສາລີ ຍັງໄດ້ໃຫ້ກຽດ ມີຄໍາເຫັນໂອ້ລົມຕໍ່ພິທີ ເຊິ່ງສະຫາຍ ໄດ້ຍ້ອງຍໍຊົມເຊີຍ ຕໍ່ຜົນງານທີ່ຄະນະໜ່ວຍພັກ ແລະ ສະມາຊິກພັກ ສາມາດຍາດໄດ້ ເປັນໜ່ວຍພັກ ປອດໃສ, ເຂັ້ມແຂງ, ໜັກແໜ້ນ 3 ປີ ລຽນຕິດພ້ອມທັງເນັ້ນໜັກ ໃຫ້ຄະນະໜ່ວຍພັກ ແລະ ສະມາຊິກພັກ ສືບຕໍ່ຄົ້ນຄວ້າ, ຊອກຮູ້ຮໍ່າຮຽນ ກໍາແໜ້ນ ແນວທາງນະໂຍບາຍ, ກົດລະບຽບຂອງພັກ, ກົດໝາຍ ແລະ ລະບຽບການຂອງລັດ, ເຄື່ອນໄຫວຕາມພາລະບົດບາດ, ສິດ ແລະ ໜ້າທີ່ ເປັນຕົ້ນ ພ້ອມກັນສຸມໃສ່, ວຽກງານກວດກາພັກ, ວຽກງານກວດກາລັດ ແລະ ວຽກງານຕ້ານການສໍ້ລາດບັງຫຼວງ, ກວດກາຕາມ 03 ຮູບການ, ຖືເອົາຫຼັກການລວມສູນປະຊາທິປະໄຕ, ນໍາພາເປັນໝູ່ຄະນະ, ແບ່ງວຽກໃຫ້ບຸກຄົນຮັບຜິດຊອບຕໍ່ໜ້າທີ່ການເມືອງໃຫ້ລະອຽດຈະແຈ້ງ, ສືບຕໍ່ຮັກສາມູນເຊື້ອນາມມະຍົດໜ່ວຍພັກປອດໃສ, ເຂັ້ມແຂງ, ໜັກແໜ້ນ, ເຕົ້າໂຮມຄວາມສາມັກຄີພາຍໃນ ພາຍນອກ, ໃຫ້ໜັກແໜ້ນ.