ໃນວັນທີ 14 ມັງກອນ 2025, ສະຫະພັນກຳມະບານ ຄະນະກວດກາສູນກາງພັກ ແລະ ອົງການກວດກາແຫ່ງລັດ ໄດ້ຈັດກອງປະຊຸມໃຫຍ່ ຄັ້ງທີ IV ຂຶ້ນ, ພາຍໃຕ້ການເປັນປະທານຂອງ ທ່ານ ແສງທອງ ຊາວພູວົງ ຄະນະບໍລິຫານງານສູນກາງກໍາມະບານລາວ, ປະທານສະຫະພັນກໍາມະບານ ຄະນະກວດກາສູນກາງພັກ ແລະ ອົງການກວດກາແຫ່ງລັດ, ໃຫ້ກຽດເຂົ້າຮ່ວມຂອງ ທ່ານ ເລັດ ໄຊຍະພອນ ກໍາມະການສູນກາງພັກ ປະທານຄະນະບໍລິຫານງານສູນກາງສະຫະພັນກໍາມະບານລາວ; ທ່ານ ສຸກຄໍາເພັດ ເຮືອງບຸດສີ ກຳມະການປະຈຳພັກ, ຮອງປະທານຄະນະກວດກາສູນກາງພັກ, ຮອງປະທານອົງການກວດກາແຫ່ງລັດ ແລະ ຮອງຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ, ຜູ້ຊີ້ນໍາອົງການຈັດຕັ້ງມະຫາຊົນ; ມີບັນດາທ່ານຮອງປະທານຄະນະກວດກາສູນກາງພັກ ແລະ ອົງການກວດກາແຫ່ງລັດ, ພ້ອມດ້ວຍສະມາຊິກກໍາມະບານ ທົ່ວຄະນະກວດກາສູນກາງພັກ ແລະ ອົງການກວດກາແຫ່ງລັດເຂົ້າຮ່ວມ.

ໃນກອງປະຊຸມ ທ່ານ ແສງທອງ ຊາວພູວົງ ໄດ້ຜ່ານຮ່າງບົດລາຍງານການເມືອງ ແລະ ທິດທາງແຜນການໃນຕໍ່ໜ້າ ໂດຍໄດ້ຍົກໃຫ້ເຫັນຜົນງານດ້ານດີທີ່ຕັ້ງໜ້າ, ດ້ານອ່ອນຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ໃນ ໄລຍະ 5 ປີຜ່ານມາ ຈາກນັ້ນ, ທ່ານ ອະນຸສິດ ພິມມະສານ ຮອງປະທານສະຫະພັນກຳມະບານ ຄະນະກວດກາສູນກາງພັກ ໄດ້ຜ່ານຮ່າງບົດສຳຫຼວດການນຳພາລວມ ຂອງສະຫະພັນກຳມະບານ ຄກສພ-ອກຫລ, ໂດຍໃຫ້ຮູ້ວ່າໃນໄລຍະຜ່ານມາຄະນະບໍລິຫານງານສະຫະພັນກຳມະບານ ຄະນະກວດກາສູນກາງພັກ ເເລະ ອົງການກວດກາແຫ່ງລັດ ໄດ້ເອົາໃຈໃສ່ນໍາພາ-ຊີ້ນໍາ, ປຸກລະດົມ ແລະ ຊຸກຍູ້ສະມາຊິກກໍາມະບານ ເປັນເຈົ້າການໃນການເຂົ້າຮ່ວມຄົ້ນຄວ້າເຊືີ່ອມຊຶມແນວທາງນະໂຍບາຍ, ມະຕິ, ຄໍາສັ່ງ, ກົດລະບຽບຂອງພັກ, ກົດໝາຍຂອງລັດ ແລະ ບັນດາຂໍ້ກໍານົດ, ກົດລະບຽບຕ່າງໆ ຂອງສະຫະພັນກໍາມະບານວາງອອກໃນແຕ່ລະໄລຍະຢ່າງເປັນປົກກະຕິ ຄຽງຄູ່ກັບການນໍາພາສຶກສາອົບຮົມການເມືອງ-ແນວຄິດ, ການປະຕິບັດຂໍ້ແຂ່ງຂັນ “ຮັກຊາດ ແລະ ພັດທະນາ” ແລະ ຂໍ້ແຂ່ງຂັນ “3 ໜ້າທີ່ 12 ຂໍ້ປະຕິບັດ” ກໍຄືຂໍ້ແຂ່ງຂັນ 5 ເປັນເຈົ້າ ຂອງສະຫະພັນກໍາມະບານ. ເຮັດໃຫ້ສະມາຊິກກໍາມະບານ ມີຄຸນສົມບັດສິນທໍາປະຕິວັດ, ມີສະຕິຕໍ່ການຈັດຕັ້ງ, ຕໍ່ກົດໝາຍ ແລະ ລະບຽບການຕ່າງໆຂອງລັດ, ຊື່ສັດບໍລິສຸດ, ບໍ່ສວຍໃຊ້ໜ້າທີ່ຕໍາແໜ່ງ, ຕ້ານທຸກການກະທໍາທີ່ບໍ່ຖືກຕ້ອງ, ມີສະຕິລະວັງຕົວຕໍ່ກົນອຸບາຍມ້າງເພທໍາລາຍຂອງສັດຕູ ແລະ ພວກຄົນບໍ່ດີ, ມີຄວາມອົດທົນ, ບໍ່ຄອນແຄນຕໍ່ສະພາບຄວາມຫຍຸ້ງຍາກທາງດ້ານເສດຖະກິດ ແລະ ມີຄວາມອຸ່ນອ່ຽນທຸ່ນທ່ຽງໃນການເຮັດໜ້າທີ່ວຽກງານທີ່ໄດ້ຮັບມອບໝາຍໄດ້ເປັນຢ່າງດີ.